Passages de TdH où il est question de choses marines

K4 r°: "un fort construit pour l'effect, sur la riviere: ainsi que les mariniers de ce pays, ont accoustume faire, quant ilz traictent avec les Brisilians: lequel boys iceulx sauvaiges troquoient, et permutoient aux mariniers dessusditz, en haches, serpes et coings de fer, selon leur usage et maniere de faire, La troque et commerce ainsi faite, Le boys estoit batellé par gondoles et esquiffes, en un grand navire a deux Hunes ou gabyes, radiant sur ses ancres: laquelle estoit bravement enfunaillée et close sur son belle, de paviers aux armaries de France, entremeslées de croix blanches, et pontée davant arriere: l'artillerie rengée par les lumieres et sabortz: tant en proue qu'en poupe, et le long des escottartz: Entre les pavyers du belle et du suzain, se monstroient force picques, lances {l'ances} et faulces lances {l'ances} à feu, dru et menu entrelardez, les Hunes garnies de dartz et de traict, entre les pavyers, imprimez de croix blanches, et fleurs de lys d'or sur champ d'azur. Les Bannieres et estendartz de soye tant hault que bas, estoient semées dancres et de Croissantz argentez, undoyantz plaisamment en l'air. Les matelotz estoient vestus de sautembarques, et bragues de Satin, my partis de blanc et noir, autres de blanc et verd, qui montoient de grande agillité le long des haulbancz, et de l'autre funaille."

M1 v° - M2 r°: "Les conseillers Eschevins de Rouen, avoient fait equiper deux navires, l'une à tref quarré, comme celles de ce pays, portant deux rondes gabies, garnyes de Paviers, et de tout autre artillage, L'autre à deux artimons, en facon de crevelle de Portugal, lesquelles deux navires, representerent lors une gentille Naumachie, singulierement bien conduicte et executée. Ladicte crevelle, equipée au nage, a toute extreme force de Rames, veint sentir à la vollée du canon, comme faisoit un corsaire, ou pirate de l'Affrique, le navire de ce pays qui radioit sur ses anchres, pres de terre. Quoy voyant apres avoir dilligemment vire au cabesta et empicque ses anchres sur les bittes, sans avoir la patience de caponner ses anchres, veint à voille desployée et à la rame, canonner de pres la crevelle, et apres sa vollée d'artillerie, l'abborder, et enferrer: Estantz ainsi bauc à bauc, combatirent quelque temps de proue et de pouppe, si furieusement avec picques, rancons, pertuysanes, lances, {l'ances} dartz, {d'artz} grenades, et potz à feu, courants à travers l'eau, qu'on les eust jugé combatre mortellement et à oultrance, non sans donner un grand effroy, aux regardants, accompaigné d'incredible joye, quant ilz virent la crevelle de Portugal derompue, et brisée, les voilles et funaille en feu, qui se respandoit davant arriere, sans toutesfois, que nul des mattelotz en fut offencé, Ce voyant la nef à tref quarré, comme victorieuse, avec petite perte, se desempara de la crevelle, Les mattelotz de laquelle, se gettoient à la desesperade, en l'eau avec leurs armes et enseignes, cullebutans l'un sur l'autre, tendants à fin d'eulx sauver, à nouer, {n'ouer} en l'isle prochaine, Ce qui causoit, un grand esbahiseement, à gents non accoustumez à telles furies de guerre, et neaumoins, un joyeulx contentement, voyants qu'en un tel et si violent assault d'armes trenchantes, et aspreté de feu, n'y eust aucun endommagé en sa personne. Grand nombre d'esquiphes, gondrez, et almadies, equippées de mattelotz, tous vestus de rouges hoquetons, vaugoient à la Venitiane, environ de la crevelle, avec grand bruit de leurs acclamations, correspondantz au son du sifflet ou huchet, embouché de leur Patron. Esbat certes qui accompaigna merveilleusement bien, le reste de ce triumphant spectacle.
    [O] De l'autre bande du Pont, de la partie {parrie} du Ponent, grand nombre de navires estoient rengées, le travers de la riviere, Lesquelles joingtes et serrées bauc à bauc l'une de l'autre, par leur disposition representoient, la figure d'un Croissant, Spheriquement compassé. La circonference duquel, estoit remplie de six galleres, couvertes en pouppe de drap d'or frize, et de drap d'argent, quille de mesme, rengée de frenge et houppes de fil d'or et d'argent traict, accordé de bonne grace. Les estendars et bannerolles, en grand nombre, fleuretes d'ouvrage Damasquin, blanc et verd, d'aucunes blanc et rouge, des autres noir et blanc, voletans en l'air, enrichissoient fort l'aornement d'icelles, avec la chiorme, qui estoit vestue de robes, et capuchons rouges, noir et verd, assortez de blanc. Les rames, mastz, vergues, et artillage de la suyte. Lesquelles galleres, rendoient une figure triangulaire, comme un Deltoton, {D'eltoton} signe celleste, Aux aelles des galleres, estoient anchrez, deux gallions ou roberges, tous lesquelz vaisseaulx, d'autant bien seans aornemens enrichis, que rien mieulx et apareillez les vergues en bataille, Saluerent d'artillerie le Roy, de telle impetuosité, qu'il sembloit que la machine du monde, deust {d'eust} lors estre par feu et tempeste fouldroyée. Et à l'instant mesme, grand nombre de canons, et coullevrines de bronze, que l'on avoit fait renger sur le cail de la riviere, deschargea sa vollée, de si grande force, que la terre et le pont en furent esbranllez, il veint bien apoint, que l'air estoit pour lors clair et serain, plus qu'on ne l'avoit veu de long temps, et que par le vent, nommé epheliotes, et par noz mariniers, levant, ou est doulcement ventant, de la part d'Orient."

P4 r° - P4 v°: "[O] Ceste salutation agré receue, icelle Thetis se precipita d'une allegre hardiesse, des appuys du Pont dedans la riviere de Seine, Le semblable firent Amphitrite et les trois autres Nereides, lesquelles furent retirées de l'eau par les gondolles, qui vaugoient pres du Pont, apres qu'elles se furent par long temps esgayees au nage. La Naumachie des Francoys contre les Portugaloys, fut pour la seconde foys raffreschie, {r'affreschie} ou fut sacquementée et brullée a labordage, le Crevelle. Le Char triumphant de Neptune, accompaigné de son tresamé filz Orion, de ses Tritons de AEolus et ses quatre ventz, fut en sa presence tiré des Hippopotames. Les trois Sirenes s'esgayerent sur l'eau, La Balene et ballenotz, portans sur leur doz plusieurs dieux Maritimes et fluviaulx, regorgerent force poissons, Le daulphin {d'Aulphin} se dardoit sur la superficie de leau, Comme Iphiclus sur les espicz de forment, la fut ouye une delectable melodie de Trompes Cornetz et tous autres instrumentz musicaulx, Vous eussies veu Sergestus agilement conduire son Centaure, Gyassa Chymere, Cloanthus Scyllam, Menesteus Pistrin, et autres plusieurs Argonautes, comme Typhis, zetes Calays Thelonis, Phoceus, Canopus et Peloras, dedans leurs brigantins, almadies, et esquiphes d'extresme Vitesse vauguer, et autres à force de Rames suyvir, avec petites fustes et barques, pour le secours de ceulx qui pourroient estre renversez à l'eau, Lesquelz estoient en si grande quantité, que les Poissons se pouvoient bien dire couvertz, comme souz l'umbrage d'une crotte de glace, contenant uniement tout le planice de leau. Et de l'autre bande de la Riviere tyrant vers le Ponent, les navires, gallions, galleres, galliotes et Roberges, ainsi rengées et equipées, et Richement parees, tant en Proue et flans de pouppe, et coursies, que Hunes, et gabies, de pavillons, bannerolles, marmoutes, funaille, sartes, et tout autre artillage, de blanc et verd, la chiorme des galleres, consonante aux couleurs. Et ainsi que la Royne se delectoit au contemplement de tant divers et singuliers esbatementz, L'artillerie de dessus le cail, et celle des gallions, galleres, et navires, despara avec si grand effroy et retondissement de la riviere, qu'il sembloit que le Pont, et la forteresse d'icelluy, deussent {d'eussent} voller par esclatz, ou que Jupiter voulsit de rechef fouldroyer les geantz à la compaigne de Flegra, lors que Hercules se battoit contre eulx, Pour lequel effroy, les Haquenees des princesses, et dames se prindrent à rudement se demener, et trepeler du pied, rompans leur ordre, sans toutesfoys aucune offencer, ou getter par terre."

Vocabulaire non relevé par Poille

anchres, anchrez, apareillez, artimons, bannerolles, barques, bittes, brigantins, brisée, cail, canonner, caponner, corsaire, coursies, empicque, epheliotes, esquiffes, esquiphes, estendars, estendartz, flans, funaille, fustes, gondoles, gondolles, levant, mastz, matelotz, mattelotz, Naumachie, patron, pirate, proue, rame (à la), rames, rames (à force de), rengé (passim), sabortz, sentir, Venitiane (à la), vire, voille desployée (à), vollée.