MON intention n'estoit pas (Amis lecteurs) de r'imprimer si tost ce Dictionaire François Latin, que par ma premiere impression i'auoy mis en lumiere auec le plus de perfection qu'il m'estoit lors possible: mais ayant veu que la cupidité de gain d'aucuns les a meus depuis nagueres le mettre en auant du tout selon mon premier exemplaire, y adioustant sans plus ne sçay quels cathalogues mal ordonnez de noms d'aucunes villes, ce qui touche seulement au prouffit & vtilité publique, n'ay voulu pour le bien & singulier contentement de vous, plus auant differer de vous communiquer & faire part de ce que i'ay fait extraire de plusieurs escripts de M. Nicot Conseillier & maistre des requestes de l'hostel du Roy, concernant le faict & pourpris de cedict Dictionaire, qui en est augmenté d'un tiers plus qu'il n'estoit en madicte premiere impression. Et si la precipitation d'iceulx ne m'eust quasi osté des poings ceste presente augmentation, qui par moy a esté mise en cedict Dictionaire, i'eusse retiré encores du mesme endroit plusieurs choses qui eussent indubitablement rendu ce Dictionaire au plus pres de la perfection qu'on luy peult desirer. Mais ie ne lairray pourtant à suyure ces erres de croistre & mener cest oeuure iusqu'à son comble & à l'egal des Grecs & Latins Dictionaires: & dedans brief temps vous l'aurez en main: ce que le seigneur Nicot m'a octroyé, pour en retirer & recueillir ce & tant qu'il me plaira. Cependant & par ceste mienne deuxieme edition, Ie vous baille à present tous les mots concernant le faict de la nauigation, soit en fabrication & equipage de nauires de port & de guerre, ou en vens, ou en cas & accidens aduenans sur la mer: le tout prins d'un Traité redigé par ledict seigneur Nicot, De la fabrication de ses nauires en l'aduis & subiect de plusieurs Pilotes & maistres de nauires. Vous y trouuerez aussi les mots de la Venerie & Faulconnerie, & en plus grande quantité, meilleur ordre & assiette que n'estoit en madicte premiere impression des susdicts: & en plusieurs & diuerses autres matieres vous y trouuerez telle addition de mots, & mesmes explication d'iceulx, que de la melioration que i'y ay faict faire, ie n'en veux autres iuges ne tesmoings que ceulx mesmes qui m'ont voulu preuenir. Vous trouuerez le tout ne plus ne moins que ie vous di. Vous iouirez ce pendant de ceste mienne diligence en attendant l'effect de ma promesse susdicte, dont ie vous puis hardiment asseurer: me tenant desia pour nanti de tout ce qui m'est requis pour l'augmentation.   Et à Dieu.