VOICY la seconde fois que ie te fay voir ce Dictionaire, quoy que l'enuie ait voulu enseuelir sa precedente edition, sous ombre de quelque pedanterie, glissee dans vn autre, qu'on t'a fait voir plustost par ambition que pour vtilité. Tu trouueras cestuy-cy reueu & augmenté de beaucoup: & premierement pour l'vtilité des ieunes escoliers nous auons marqué les accents sur les mots ainsi qu'il les faut prononcer. Secondement nous y auons adiousté les mots Grecs chascun en son ordre & en sa propre signification. En troisiesme lieu tu trouueras l'etymologie de chasque mot & d'où il est deriué, soit d'vn mot Grec, du Latin ou du François mesme. Item nous auons distingué les diuerses significations des mots qui se peuuent rapporter à plusieurs choses differentes, & pour plus facile intelligence nous les auons distingué par paraphes, afin qu'on les puisse plus promptement trouuer: En outre nous y auons mis les noms des villes & pays, chascun en son lieu, ce qui n'auoit encor esté faict aux precedents. Le tout en plus bel ordre qu'il n'auoit encor esté. Si ie voy que tu y prennes plaisir, tu m'occasionneras de faire encore de mieux en mieux à l'aduenir. Adieu.