[O] Au treschrestien Roy ET MONARQUE DE France, par son humble serf, du Foüilloux. [FIGURE]
IL EST CERTAIN, Sire, que les hommes de tout temps se sont addonnez a plusieurs sciences hautes et ocultes: les uns a la Philosophie, pour contenter leurs espritz, les autres aux artz mechaniques, pour les richesses mondains: les inventions desquelz ont esté dispersees en tant de manieres, de les desduire par le menu: tellement qu'apres avoir le tout consideré, je me suys voulu arrester au dire de ce grand sage Salomon, qui ha escript que toutes choses qui sont soubz le Soleil ne sont que vanitez, d'autant qu'on ne veoyt science ni art qui puisse allonger la vie plus que le cours de Nature. Parce il m'ha semblé, Sire, que la meilleure science que nous pouvons apprendre (apres la crainte de Dieu) est se tenir joyeux, usant d'honnestes exercices: entre lesquelz je n'en ay trouvé aucun plus loüable que l'art de Venerie. Et d'autant que des ma jeunesse je me suys exercé en celuy art, selon mon petit pouvoir, ainsi que mes predecesseurs, je n'ay voulu estre negligent a rediger par escript ce qu'en auroys apprins par experience. Et combien qu'il en y ha en vostre Court qui peuvent mieux le faire que moy, toutesfois {touteffois} j'ay heu tant de confiance en vostre humaine majesté, que je n'ay craint vous presenter ce mien tel quel labeur, esperant que le recevriez en gré, comme de celuy qui est vostre treshumble esclave et serf.