[O] Receptes pour guarir les CHIENS DE PLUSIEURS MALADIES.
[FIGURE]
LES Chiens sont subjetz a plusieurs maladies, mais la plus grande de toutes, c'est la rage, dont il y en ha sept especes. La premiere est appellee la rage chaude, et desesperee, laquelle ne se peut guarir, par-ce qu'elle est tant ennemye du sang, qu'incontinent que le venin est meslé par-my, il le brusle et infecte soudainement: et alors que la cervelle sent les fumees de ce venin, elle se tormente de telle façon que soudain elle fait desesperer et travailler le corps de ces pauvres animaux, comme on peut veoir par experience. On cognoist les Chiens qui ont ceste espece de rage en plusieurs sortes. Premierement, quand ilz courent ilz levent la queüe toute droite, ce qu'ilz ne font pas en toutes les autres rages. Ilz courent sus a tout ce qu'ilz trouvent devant eux, tant aux bestes d'aumaille, qu'autres, sans regarder par ou ilz passent, soit au travers des rivieres ou estangs: et si ont la gueule fort noire, et sans escume. De ceste espece de rage, ilz ne courent que troys ou quatre jours pour le plus, a cause du mal et travail que leur donne ceste maladie. Quand ilz ne peuvent plus aller, ilz hurlent une façon d'hurlement tout casse, et rance, non pas naturel, comme s'ilz estoyent sains. Toutes les bestes qu'ilz morderont, tant Chiens qu'autres animaux, s'il en sort du sang, ilz enrageront sans aucun remede.
La seconde espece de rage se nomme rage courante, laquelle est semblablement incurable, mais la morsure n'en est pas si veneneuse ne dangereuse envers les autres animaux, que de l'autre, parce qu'elle ne tient pas incessamment. Et quand un Chien est enragé de ceste espece de rage, le premier Chien qu'il mort au commancement du jour, emporte tout son venin, et sera en danger d'enrager: mais tous les autres qu'il mordera apres le reste du jour, ne cuyderont pas enrager. Quand ilz ont telle rage, ilz ne courent a bestes, ne a hommes, qu'aux Chiens, et s'en vont escoutans pour oüyr les abboiz des autres Chiens, a fin de les aller desbrayer et mordre. Ilz suyvent les grans chemins, et mettent la queüe entre les jambes, trotans comme fait un Regnard: ilz peuvent vivre neuf moys pour le plus. Ces deux especes de rage, sont les plus dangereuses de toutes les autres. Et quand les Chiens veulent enrager de ces deux especes, on le cognoist en cette sorte. Premierement, ilz ne mangent que bien peu. Ilz sentent les autres Chiens, et apres les avoir sentis, ilz les mordent en les cherissant, et demenant la queüe. Ilz font de grans souspirs en souflant du nez: ilz ont un regard de travers, et triste. Ilz courent les mousches et papillons. Et y ha assez d'autres signes fort apparans, que je laisse a cause de breveté. Quand on veoit telz signes, il les faut oster d'avec les autres, et les enfermer, car leur haleine pourroit infecter, et faire enrager les autres Chiens, par-ce que telles maladies se prenent entr'eux, comme la peste entre les hommes.
Les autres cinq especes de rage ne sont pas si dangereuses de beaucoup car les Chiens n'en courent et n'en mordent point, dont je les pense plus tost maladies que rage: combien que Phebus et plusieurs autres, ont nommé toutes les sept especes, rages incurables, si est-ce que j'ay guary des Chiens de rage de cinq especes cy dessoubz mentionnees, avec les Receptes que mettray en apres par escript. Ces cinq especes de maladie ou rage, se nomment en ceste sorte.
La premiere s'appelle rage mue, laquelle tient dedans le sang, et la cognoistrez en ceste façon. Les Chiens qui l'ont ne veulent point manger, et ont tousjours la gueule ouverte, mettans la patte dedans, comme s'ilz estoyent ennossez, et se cachent volontiers en lieu frais, et humide.
La seconde rage s'appelle la rage tombante, par-ce qu'alors que les Chiens l'ont, s'ilz sont de bout, et qu'ilz cuydent marcher, ilz tombent par terre comme s'ilz avoyent le mal de saint Jehan: ceste rage les tient en la teste.
La tierce rage s'appelle flastree, par-ce que le mal est dedans les boyaux, qui les fait retirer de telle sorte qu'ilz sont si platz qu'on les perceroit avec une aguille.
La quarte s'appelle la rage endormie, laquelle vient d'une espece de petis vers, qui leur viennent dedans l'orifice de l'estomach, et sont engendrez d'une corruption d'humeurs, dont les vapeurs et fumees leur montent au cerveau, qui les fait dormir incessamment, ainsi meurent en dormant. La cinquiesme et derniere espece de rage, s'appelle reumatique, par-ce qu'alors qu'elle tient les Chiens, la teste leur enfle grosse, et ont les yeux jaunes, de la couleur d'un pied de Milan.
Quand les Chiens sont malades de ces maladies, ilz ne cuydent pas manger, et vivent huyt ou neuf jours sans faire aucun mal, puis meurent de faim. Car il faut entendre que le Chien ha ceste nature, qu'alors qu'il sent mal au dedans du corps (j'entendz des maladies qui leur surviennent sans estre blessez) ilz ne mangent jamais qu'ilz ne soyent guaris. Et par exemple le pouvez veoir, quand quelque Chien est malade, et qu'on luy donne de la gresse, il ne la mange que premier il ne soyt allé paistre de l'herbe, et qu'il n'ait rendu sa gorge, et soyt guary.
Il y ha plusieurs hommes qui ont voulu dire que le ver qui vient soubz la langue du Chien, est la cause de le faire enrager, ce que je leur nie: combien qu'on dye que le Chien ne court pas si tost en ceste maladie, quand il ha le ver osté de la langue. Je m'en rapporte a ce qui en est.
Ces maladies prenent entre les Chiens pour s'halener et frequenter les uns avec les autres. Et est besoing, si quelque Chien ha ces maladies en un chenin, d'oster tous les autres, et les remuer en un autre lieu: car, comme j'ay dit cy dessus, telles maladies se prenent entre les Chiens comme la peste entre les hommes.

Les receptes pour guarir des cinq especes de rage. Et premierement de la rage mue.
QUAND un Chien aura la rage mue, pour le guarir, il faut prendre le poix de quatre escuz de just de la racine d'une herbe nommee Spatula putrida, dicte Passe-rage, laquelle ha la fueille comme Iris, toutes-fois qu'elle est un peu plus noire: et mettre ce just en un petit pot plombé, puis prendre le poix de {de de} quatre escuz du just des fueilles d'une herbe nommee l'herbe du Cru, autrement Helebore noir, puis le poix de quatre escuz du just de l'herbe de la Rue. Si les herbes ne rendoyent just, faut prendre la decoction d'icelles. Et quand tous les justz seront ensemble, il faut mettre autant de vin blanc comme de just de Rue. Puis faudra passer tous les justz des herbes, et le vin blanc, en un beau linge net, et mettre tout en un verre. Ce fait, faut prendre deux dragmes de Scamonee sans estre preparee, et la mesler par-my tous les justz: puis prendre le Chien avec une serviette, et luy ouvrir la gueule, en luy mettant dedans une oüillette, ou entonnoir, ou une corne de Beuf percee, et luy faire avaller le tout en luy tenant un peu la teste levee, de peur qu'il rende sa gorge. Apres luy avoir baillé ceste medecine, on le doyt saigner avec un cousteau, comme lon saigne les Chevaux, en la gueule: sçavoir est, aux denteleures, qui sont en la maschoüere de dessus, au palais, qui est par le dedans de la gueule, et luy couper deux ou troys denteleures, a fin qu'il saigne plus fort. Puis mettrez reposer le Chien sur la paille, et il guarira. Vous notrez que l'herbe que le vulgaire appelle corne de Cerf, ou dent de Chien, est souveraine pour toute rage, si on fait boire au Chien huyt dragmes du just d'icelle herbe, avec un peu de sel.

Recepte pour la rage tombante, qui procede du cerveau.
IL faut prendre le poix de quatre escuz du just de la fueille ou graine d'une herbe qu'on nomme Paeonia, en François, Peaune, j'entens de celle qui porte graine. Puis prendre le poix de quatre escuz du just de la racine d'une herbe nommee Bryonia, en Françoys du Parc, laquelle herbe vient dedans les hayes, et ha la racine grosse comme la jambe d'un homme. Puis prendre le poix de quatre escuz du just d'une herbe qu'on nomme Croisette, en Latin Cruciata: puis prendre quatre dragmes Destafiacre bien broyé, et en poudre, et le mesler avec tous les justs des dessusdictes herbes, et faire boire le just au Chien, comme dessus. Cela fait, il luy faut fendre les oreilles pour le faire saigner, ou bien le saigner de deux veines qui vienent par le dedans des espaules des jambes de devant, qu'on appelle pour les Chevaux les arcs. Et si d'avanture on voyoit que la medecine fist peu d'operation pour la premiere fois, il la faut reiterer.

Recepte pour la rage endormie, laquelle procede de vers.
PRENEZ le poix de six escuz du just d'Absince, et le poix de deux escuz d'Aloe en poudre, le poix de deux escuz de poudre de corne de Cerf bruslee, avec deux dragmes d'une drogue nommee Agaric, puis mesler les justz, et les poudres ensemble. Et si vous voyez qu'il y ayt faute de just, et que les poudres fussent trop espesses, pour faire avaller au Chien, il y faut mettre du vin blanc, jusques aux poix de quatre ou six escuz, puis faire avaller le tout au Chien, comme dessus.

Recepte pour la rage reumatique, laquelle vient en jaunisse.
IL faut prendre le poix de six escuz du just ou decoction de la racine de Fenoil, le poix de quatre escuz du just ou decoction de Guy, qui croist dedans les Aubepins, le poix de quatre escuz du just ou decoction de Lierre, le poix de quatre escuz de poudre ou marc de la racine du Polipode, qui croist dedans les chesnes, et mettre le tout en un petit poilon, et le faire boüillir avec du vin blanc, puis quand il sera refroidy un peu, il le faut soudain faire avaller au Chien, comme dessus.

Recepte pour la rage flastree.
QUAND a la rage flastre, qui tient dans les boyaux, et plusieurs autres maladies, comme goutes, estrusfleures, refroidissemens, et toutes autres maladies engendrees de froides causes, elles se guarissent par baings et estuves, dont la recepte s'ensuyt.

Recepte des baings pour guarir les Chiens des maladies venues de froides causes.
IL faut prendre deux grandes poisles, tenantes chascune six seaux, esquelles vous mettrez en chascunes d'icelles dix joinctees de chascune espece des herbes qui s'ensuyvent. Sçavoir est, dix jointees d'une herbe nommee Armoise, dix jointees de Romarin, dix jointees de Sauge menue, dix jointees de racines ou fueilles de Guymauves blanches, dix jointees de racines ou fueilles d'Hyebles, dix jointees de fueilles ou racines de Fenoil, dix jointees de Marachemin blanc, ou de Melisse, dix jointees de Rue, dix jointees d'Enulacampana, scavoir est fueille et racine, dix jointees de Lapaces, dix jointees de Buglosse, et de Melilot: et mettre le tout dedans les susdictes poiles, lesquelles faut emplir de deux partz d'eau, et le tiers de vin, et faire le tout boüillir ensemble, jusques a ce qu'il soit consommé du tiers, puis quand les herbes seront bien cuytes, il faut prendre les poiles, et jetter toutes les herbes et leur decoction en une pippe, en laquelle faut mettre quatre seaux de bonne et forte lie de vin: puis prendre lesdictes poiles, et les remettre sur le feu comme elles estoyent au par-avant, les emplissans le tiers vin et eau, comme dessu: apres faut avoir un sac neuf, et aller chercher des fourmieres et gros fourmis rouges, lesquelz faut prendre avec les oeufz, et toutes leurs coques, puis les mettre boüillir et consommer dedans lesdictes poiles, avec troys ou quatre picotins de sel: et quand le tout sera bien consommé jusques a la tierce partie, et que l'eau sera bien grasse, il faut verser le tout dedans la pippe ou ha esté versee la premiere decoction, et laisser reposer toutes les choses susdictes ensemble, jusques a ce que le tout soyt un peu plus chaut que tiede: et a l'heure mettrez les Chiens malades dedans, les faisans baigner l'espace d'une bonne heure, sans sortir. Mais il se faut donner garde d'eux, en les tenant, de peur qu'ilz se noyent, ou evanoüyssent dedans la pippe. Puis apres les faudra mettre en quelque lieu bien chaudement, là ou ilz ne prenent point de vent, de peur qu'ilz se morfondent et refroydissent, et les faut baigner quatre ou cinq jours ensuyvans, en faisant rechauffer l'eau, car ceste premiere decoction pourra servir pour tous les baings. Et avant que de mettre les Chiens malades, la premiere foys, dedans le baing, il les faut purger en ceste sorte.

Recepte pour purger les Chiens avant que les mettre dedans le baing.
PRENEZ une once et demye de casse, bien mundee, deux dragmes et demye d'Estafiacre en poudre, deux dragmes et demye de Scamonee, preparee dedans du vin-aigre blanc, avec quatres onces d'huyle dolif: et destrempez le tout ensemble, en le faisant un peu chauffer sur le feu, puis le faictes avaller au Chien vers le soir, sans luy donner a manger, et le lendemain le mettrez dedans le baing a jeun.

Baing pour laver les Chiens quand ilz ont esté mordz de Chiens enragez, de peur qu'ilz enragent.
QUAND les Chiens sont mordz ou desbrayez de Chiens enragez, il faut incontinent emplir une pippe d'eau, puis prendre quatre boisseaux de sel, et les jetter dedans, en meslant fort le sel avec un baston, pour le faire fondre soudainement: et quand il sera fondu, faut mettre le Chien dedans, et le plonger tout, sans qu'il paroisse rien, par neuf fois: puis quand il sera bien lavé, faut le laisser aller, cela l'empeschera d'enrager.

Autre recepte par motz preservantz de la rage.
J'AY appris une recepte d'un Gentil-homme en Bretaigne, lesquel faisoit de petis escripteaux, ou n'y avoit seulement que deux lignes, lesquelz il mettoit en une omelette d'oeufz, puis les faisoit avaller aux Chiens qui avoyent esté mordz de Chiens enragez, et y avoit dedans l'escripteau, Y RAM QUI RAM CAFRAM CAFRATREM CAFRATROSQUE. Lesquelz motz disoyt estre singuliers pour empescher les Chiens de la rage, mais quant a moy je n'y adjouste pas foy.

Des maladies de la galle, des dartres, gratelles, et rongnes des Chiens.
IL y ha quatre especes de galles, sçavoir est la galle rouge et menüe, qui enfle les jambes des Chiens. La galle dartree, laquelle vient large comme la paume de la main, qui enleve le Cuyr des Chiens. La galle commune appellee rongne. La galle noire, qui est soubz le cuyr, laquelle faict tomber tout le poil. Desquelles galles la rouge est la pire, et plus mal aysee a guarir, par-ce qu'elle est engendree de morfondeures, que les Chiens prenent l'hyver en passant les eaux, et a coucher en lieux humides, sans estre chauffez, ne sechez: ou bien leur vient pour estre nourris aux boucheries a manger le sang des Beufz et Vaches, qui leur eschauffe le corps. Telles especes de galles se doyvent guarir en ceste sorte. Il faut premierement purger le Chien de la medecine que j'ay mise cy dessus pour le baing: puis le lendemain luy tirer environ deux onces de sang, d'une veine qui est entre la corde du jaret et l'os de la jambe, puis a deux jours de la, on le doyt frotter d'un onguent fait selon la recepte qui s'ensuyt.

Recepte pour faire guarir les Chiens de la galle, des dartres, gratelles, et rongnes.
IL faut prendre troys livres d'huyle de noix, une livre et demye d'huyle de cade, deux livres de vieux oingt, troys livres de miel commun, de vin-aigre une livre et demye: le tout bien boüilly ensemble, jusques a la consommation de la moytié dudit vin-aigre. Puis y adjoustrez de la poix ou geme, et poix-resine, de chascune espece deux livres et demye, de cire neufve demye livre. Et ferez fondre le tout ensemble, en le mouvant tousjours avec un baston de palme ou de canne. Et quand le tout sera fondu, il y faut mettre les poudres qui s'ensuyvent, estant le tout hors du feu, et premier, une livre et demye de souffre, deux livres de coperose recuyte, douze onces de verdet, en mouvant tousjours le tout jusques a ce qu'il soyt froid. Cest onguent peut guarir toutes especes de galles, tant fortes soyent elles, et faut premier que de frotter les Chiens de cest onguent, les laver avec de l'eau et du sel, pour leur mondifier le cuyr: puis mener les Chiens aupres d'un grand feu, et les frotter, et enfondre bien cest onguent: cela fait les attacher aupres du feu, avec une chaine de fer, et les laisser suer là l'espace d'une bonne heure et demye, en leur donnant de l'eau a boire tout leur saoul. En apres les faut nourrir de bons potages, et de chair de mouton, boüillie avec quelque peu de soufre, pour leur reschauffer le corps, et avec de bonnes herbes, en leur continuant l'espace de huyt jours.

Autre recepte pour les dartres.
LA galle dartreuse provient a aucuns Chiens, de nature ou de race, ou bien de vieillesse: laquelle galle se peut guarir en ceste sorte: Il faut premierement prendre le Chien, et oster le poil des endroitz ou sont les dartres, puis faut avoir du lexif, du vin-aigre, et du sel, et le frotter fort, jusques a ce que les dartres saignent, puis quand elles saigneront, faut prendre d'un onguent dont la recepte s'ensuyt. Prenez une livre d'onguent appellé Unguentum enulatum, demye livre d'un autre onguent appellé Pompheligos, deux livres d'huyle de noix, poix ou geme une livre, une livre d'huyle de cade, demye livre de suye, demye livre de soufre, demye livre de vitriol vert, litarge d'or quatre onces, ceruze quatre onces, verdet quatre onces, alun de glaz six onces: le tout bien en poudre boüilly et incorporé ensemble, avec demye livre de vin-aigre. Et sera un onguent propice pour la maladie susdicte, frotant les Chiens, comme dessus.

Recepte pour la rongne commune.
LA rongne commune provient aucunes-fois par faute que les Chiens n'ont point d'eau nette pour boyre a leur heure, et en souffrent, ou bien prent pour coucher salement, comme es lieux ou sont les Porceaux, ou sur de la paille salle ou auroyent couché d'autres Chiens galleux, ou bien vient ceste galle de morfondures. Telles galles sont aisees a guarir, sans les frotter de drogues, mais seulement du just ou decocation d'herbes, dont la recepte s'ensuyt.
Prenez deux joinctees de Cresson sauvage, autrement appellé Berne, et deux joinctees d'Enula-campana, vulgairement appellee Leaune, des fueilles ou racines de Lapace, de la racine de Roerbe, de chascune deux jointees, et des racines de Frodilles, pesant la quantité de deux livres: puis piler toutes ces herbes et racines, et les faire bien boüillir avec du vin-aigre, et un peu de lexif. Apres que tout aura bien boüilly, faut passer la decoction ou bien le just d'icelles herbes et racines, et adjouster par-my lesditz justz ou decoction, deux livres de Savon commun, et le faire fondre dedans: puis quand il sera fondu, lon en frottera et lavera les Chiens par quatre ou cinq matins ensuivans, et ilz guariront. Les receptes sont veritables, car je les ay esprouvees.

Receptes pour guarir les Chiens des louppes.
IL survient aucunes-fois aux Chiens des louppes, et pour bien les guarir, il faut regarder les lieux ou elles sont, d'autant que si elles estoyent en endroitz sur le corps du Chien ou il y eust abondance de venes ou arteres, elles seroyent fort difficiles a oster en telz endroitz. Celuy qui les ostera, se doyt gouverner en ceste maniere.
Il faut premierement entendre qu'il y ha deux manieres de les guarir, l'une par incision, et l'autre par recepte, comme je declaireray cy apres. Celuy qui voudra user d'incision, doyt regarder combien il y ha de venes qui entrent dedans ou dessus la louppe, puis faut qu'il ayt une aguille, laquelle doyt avoir la pointe carree, et un peu courbee, et l'enfilera de bon filet, en passant son aguille par dessoubz la vene, et la tirera: quand le filet sera par le dessoubz, il le noüera par dessus la vene, en l'estraignant le plus qu'il pourra, puis coupera le filet, et laissera la vene bien liee, et en fera autant a toutes les autres venes qui seront dedans la louppe, de peur qu'elles rendent du sang quand il fera son incision. Et alors qu'il verra toutes les venes bien liees, il prendra son razouer, et cernera la louppe tout au-tour, laissant la lieüre de venes par le dehors de son inciseure: car il faudra que les venes soyent liees au commancement des racines de la louppe, puis couppera et enlevera sa louppe, et tout incontinent prendra un fer chaut pour cauterizer les petites fibres et arteres. Puis il fera son premier appareil de sang de Dragon, de moyeux d'oeufz, de la poudre de linge bruslé, broyé avecq' du vin-aigre: et faut emmuseler le Chien de peur qu'il arrache le filet, qui tient les venes attachees. Et faut panser le Chien tous les jours, avec du lard fondu en l'eau, meslé avecq' du Pomphiligos, battu en un mortier de plomb: mais il se faut bien prendre garde que les venes ne saignent.

Autre recepte a ce mesme approuvee.
IL FAUT prendre trois grosses espines noires, alors qu'elles seront toutes vertes, et fraischement cueillies, faictes les tremper vingt et quatre heures dedans le sang des fleurs des femmes, puis les gressez toutes troys de ce venin: et les piquez dedans le milieu de la louppe, tant qu'elles y pourront entrer: et si d'avanture elles n'y pouvoient entrer, il faut faire ouverture avec un poinson, ou une grosse espingle, et ficher les espines dedans, sans les bouger qu'elles ne tombent d'elles-mesmes, ce fait les louppes mourront peu de temps apres.

Recepte pour faire mourir les puces, poulz, et vermines des Chiens, et les nettoyer.
IL faut prendre deux jointees de fueilles de Berne, et deux jointees de fueilles de Lapace, et deux jointees de Mente, lesquelles herbes ferez boüillir en lexif de sarment, et adjousterez par-my, deux onces Destafiacre en poudre: puis quand le tout aura boüilly, faut passer les herbes subtilement, et prendre la decoction, en laquelle adjousterez deux onces de Savon, avec une once de Safran, et une joinctee de Sel, et meslerez le tout ensemble, et en laverez le Chien.

Recepte pour faire mourir, et tomber les vers.
IL faut prendre des escorces ou eschalles de noix, autrement appellees Tam, et les pilez bien fort, estans bien macerees et trempees, les mettrez en un pot, avec une chopine de vin-aigre par dessus, et les laisserez tremper environ deux heures. Ce fait, ferez boüillir au feu, deux ou troys ondes, voz drogues susdictes: puis les passerez en un beau linge blanc, et en mettrez la decoction en un pot, en y adjoustant les poudres qui s'ensuyvent: sçavoir est, une once d'aloé eupatic, une once de corne de Cerf bruslee, une once de poix-resine, en brassant toutes les poudres par-my la decoction. En apres prendre le Chien, et avec la pointe d'un cousteau faire tomber quatre ou cinq vers, et mettre le just dedans, et ilz tomberont et mourront soudainement.

Autre recepte a ce mesmes.
IL faut prendre du fiel de Beuf, de la poix-resine en poudre, aloé en poudre, chaux-vive en poudre, soufre-vif en poudre, et destrempez le tout dedans le fiel, en faisant comme dessus, et les vers tomberont et mourront.
J'eusse bien mis par escript les receptes des Anciens, lesquelz mettoyent le poil des Chiens nom-per dedans un Fresne, ou Cormier, mais telles choses abusent les hommes.

Recepte pour les Chiens mordz de Serpens, et Viperes.
PRENEZ une poignee d'herbe nommee la Croisette, ou Cruciata, une poignee de Rue, une poignee de la fueille d'un arbrisseau nommé Cassis, autrement Poyvre d'Hespagne, une poignee de l'herbe de Boillon blanc, autrement appellee Blonde, une poignee de Genetz, une poignee de Mente: et pilez fort toutes les herbes susdictes, puis quand elles seront bien pilees et conquassees, il faut prendre un verre de vin blanc, et faire le tout boüillir, une onde seulement, en un petit pot plombé, et en prendre le just ou decoction, avecq' le poix d'un escu de Theriacle meslé par-my: puis prendre le Chien, et luy en faire avaller un plein verre, et luy en laver la morsure, mettant une fueille de Boillon blanc par dessus, liee d'une branche de genetz, et il guarira.

Recepte pour faire guarir les Chiens de la morsure des Sangliers, et autres bestes mordantes.
LES Chiens sont souvent blessez des Sangliers en plusieurs parties de leurs corps, et sçelon les lieux et endroitz ou ils seront blessez, il se faut gouverner pour les panser: car si c'est au ventre, et que les trippes leur tombent, sans estre offensees ne rompues, le valet de Chiens doyt soudainement prendre le Chien, et luy remettre les trippes bien doucement dedans le ventre, avec le bout des doigtz, en la maniere que fait un chatreux quand il senne les Chienes, puis couper une petite laische ou plataine de lard, et la mettre au dedans du ventre, au droit du pertuys, et faut qu'il ayt un carrelet tout prest, et coudre la peau par dessus: mais faut entendre qu'a tous les pointz qu'il fera, il doyt noüer son filet, car autrement s'il n'estoyt noüé, et que le filet pourrist en un des pointz, tous les autres se laisseroyent aller, et par ainsi il est requis de noüer et couper le filet a chascun point. Autant en pourra il faire par toutes les blessures, qui seront aux autres lieux, y mettant tousjours un lardon, et coudre comme dessus, entretenant tousjours la playe grasse de lard, ou de gresse seulement: par-ce que le Chien se guarira plus tost de sa langue, s'il se peut licher, que de tous les onguentz dequoy on le sçauroit frotter. L'aguille doyt estre carree vers la pointe, et ronde depuis le milieu jusques au chas ou pertuis: telles sortes d'aguilles se nomment carreletz, desquelles les Barbiers usent. Les valetz de Chiens ne doyvent point aller a la chasse du Sanglier qu'ilz ne soyent garnis de telles aguilles, avec du lard pour mettre dedans les playes.

Recepte pour les Chiens qui ont esté rompuz et foulez des Sangliers, sans estre blessez.
IL advient aucunes-fois que les Sangliers foulent les Chiens du bout de la hure, sans les blesser, comme aux endroitz des costes, aux hanches et lieux nerveux. Si de fortune ilz avoyent quelque chose demoly ou rompu, on les doyt faire habiller: mais s'ilz n'estoyent que foulez, on doyt faire une emplastre avec les drogues qui s'ensuyvent.
Prenez de la racine d'une herbe appellee Symphiton, vulgairement Consolide, emplastre de Melilot, poix ou geme, et huyle rosat, autant pesant des uns que des autres, lesquelles dices drogues vous meslerez toutes ensemble, et ferez une grande emplastre sur de la toile, puis vous couperez le poil au droit du lieu ou sera la douleur du Chien, et y appliquerez vostre emplastre, la plus chaulde qu'il la pourra endurer, et il guarira.

Recepte pour les Chiens qui ont des vers dedans le corps, lesquelz ne peuvent vuyder.
IL advient aucunes-fois que les Chiens ont de grans vers, qui leur sortent du fondement, lesquelz ilz ne peuvent vuyder. A telles maladies faut faire la recepte que s'ensuyt. Prenez du just d'Absince le poix de deux dragmes, deux dragmes d'Aloé eupatic, deux dragmes Destafiacre, une dragme de corne de Cerf bruslee, une dragme de soufre, le tout pilé et incorporé ensemble, avec de l'huyle de noix, jusques a la valeur de demy verre, et faictes avaller toutes les choses susdictes au Chien, et il guarira soudainement.

Restraintif pour les Chiens aggravez.
QUAND les Chiens sont aggravez et dessolez, on leur doyt faire les restraintifz en ceste maniere.
Prenez une douzaine de jaune d'oeufz, lesquelz vous battrez avec quatre onces du just ou decoction d'une herbe qui vient sur des rochiers, appellee Pilozelle, vulgairement Oreille de Chat, ou bien avec du just ou decoction de pommes de Grenades boüillies avec du vin-aigre, et en deffaut desdictes choses pourrez prendre le vin-aigre tout simple: puis quand les oeufz seront bien battus, vous y adjousterez de la suye bien subtilement broyee en poudre, et meslerez le tout ensemble, et en frotterez les piedz des Chiens, les enveloppans avec du linge. Ce fait, laisserez reposer les Chiens tout le long du jour et de la nuict, et ilz guariront.

Recepte pour faire mourir les chancres, qui viennent aux oreilles des Chiens.
PRENEZ du Savon le poix d'un escu, d'huyle de Tartre, le poix d'un escu, de Sel armoniac, le poix d'un escu, du Soufre et Verdet, le tout soyt incorporé ensemble avec du vin-aigre blanc, et de l'eau forte, et en frottez par neuf matins le chancre.

Recepte pour garder les Chiennes d'entrer en chaleur.
DONNEZ a manger a une Chienne, avant qu'elle ayt porté des Cheaux, par l'espace de neuf matins, par chascun matin, neuf grains de poivre, et elle n'entrera jamais en chaleur. Et les luy ferez avaller avec du fourmage, ou autre chose.

Recepte pour faire pisser les Chiens.
IL advient aucunes-fois que les Chiens ne peuvent pisser ou par effortz qu'ilz ont faitz, ou par chaleur de reins. A telles maladies faut faire la recepte qui s'ensuyt.
Prenez une poignee de fueilles de Guymauves, autant de fueilles ou grenes d'une herbe nommee Archaquange, laquelle se trouve communément par les vignes, racines de Fenoil, racines de Ronces, autant pesant des unes comme des autres, et ferez le tout boüillir ensemble avec du vin blanc, jusques a la consommation de la tierce partie, puis le ferez boire et avaller au Chien, et il pissera, et sera guary.

Recepte pour les Chiens qui ont mal dedans les oreilles.
PRENEZ du verjust, et le mettez en une escuelle, puis le faictes un peu chauffer, et adjousterez dedans de l'eau de la feuille et fleur d'un arbrisseau vulgairement appellé Troesne, ou de l'eau de la fleur de Chevre-fueil, qui croist par-my les hayes, avec du miel aussi gros comme le bout du doigt, lequel meslerez par-my les eaux. Et mettrez toutes lesdictes choses dedans l'oreille du Chien, en le mouvant tousjours, puis luy ferez pendre l'oreille pour faire tomber tout ce qu'aurez mis dedans. Cela fait, vous prendrez de l'huyle Lorin, laquelle ferez chauffer, et la mettrez dedans l'oreille, en l'estouppant avec du cotton trempé en icelle huyle: luy faisant toutes lesdictes choses par cinq ou six matins, et il guarira: mais il se faut prendre garde qu'il ne se gratte.

Recepte approuvee pour faire mourir tous chancres, dartres, {d'artres} et ficz.
IL faut prendre une dragme de Sublimé en poudre, et le mettre en un mortier de plomb, avec le just et dedans d'un Citron, sans l'escorce: et quand le tout sera bien broyé, il y faut mettre dedans un peu de vin-aigre, et d'eau, puis prendre d'Alun le poix d'un escu, et autant de Savon: lesquelz broyrez et meslerez avecq' les autres choses dessus-dictes. Et faictes boüillir le tout en un petit pot, jusques a la consommation du tiers, puis appliquerez vostre-dicte decoction sur les dartres et chancres, qui seront sur la peau, et aux oreilles. Mais aux chancres qui sont sur la chair vive, comme au dedans de la peau du vit, il faut faire boüillir le Sublimé, et en jetter la premiere eau, a fin qu'elle ne soyt si corrosive, en faisant comme dessus.

Recepte pour les playes des Chiens.
LE JUST de la fueille de Chou rouge est le souverain baume pour les playes des Chiens, car si un Chien est blecé, en appliquant le just du Chou rouge sur la playe, il la consolidera soudainement: la raison est, que la chair du Chien est chaude et seche, et le chou de sa nature est chaude et humide.
J'eusse mis plusieurs autres receptes, mais craignant qu'on les trouvast ennuyeuses, j'ay seulement escript et mis les principales, et plus necessaires.

[O] Fin des Receptes.